الرئيس لما يلعب ويجا .. يا ويجا

لعبة... مجرد لعبة لا أكتر ولا أقل أكيد تعرفها ولو متعرفهاش أكيد الفيلم عرفك بيها وبتحاول دلوقت تلعبها ، ويجا ... عفريت العلبة اللى بيطلعلك أول ماتنادى عليها يفتش فى الضماير والقلوب ويكشف عن الغيب من خلال أرقام وحروف ، هى دى ويجا أو تعريف بسيط للست ويجا ... دستووور ياسياد ، وسواء مصدق أو بتستعبط وتعمل نفسك مصدق أو بترفض إنك تصدق فهذا لن يغير من الأمر شئ.. . فويجا قد انطلقت ولن يوقفها أحد وكلها يومين وتلاقى العيال بيلعبوها فى الجامعة وعلى الأرصفة وعلى عربية الكارو كمان، يعنى من الوزير للغفير ياباشا! مش بس الهاى كلاس ، يعنى ممكن كمان تلاقى سيادة الرئيس قاعد فى جنيينة أى قصر من قصوره اللى هما أصلا قصورنا إحنا وجنبه المدام والأولاد والدكتور زكريا عزمى وكلهم إيديهم على القشاط بتاع اللعبة بيحركوه يمين وشمال ويقولوا فى صوت واحد تعالى ياويجا ..... لكن ياترى أول ما تيجى ويجا ممكن تقول للرئيس ايه ؟
" ويجا" حاولت فى الأول تنافق الرئيس ماهو برضه الرئيس وله هيبة وشنة ورنة ياجدعان، علشان كده راح القشاط عند كلمة عظيم وعبور وخط بارليف والضربة الجوية نفس كلام الأغانى يعنى ... بس ويجا مستحملتش وخافت انها تضر سمعة اللعبة وشرفها خصوصا ان المشككين فيها اكتر من الهم على القلب .. وفجاة قررت تقول الحقيقة واللى يحصل يحصل هو يعنى حد هيقدر يمسكها دى عفريتة برضه .
المهم حركت ويجا القشاط "بيلعبوها ببريزة ساعات بس اكيد الرئيس بيلعب بجنيه دهب.. الرئيس بقى " بتاع اللعبة وراح ناحية الرقم 9 أربع مرات .. فضحكت المدام وقالت " شوفت الأروبة بتفكرك بايام الاستفتاءات ونتيجة ال99.99 الشهيرة والله كانت ايام حلوة ومكنش حد بيفتح بقه دلوقت خليت اللى يسوى واللى مايسواش عاوز يبقى رئيس الجمهورية .. اسمع كلامها وإرجع تانى للأربع تسعات على الاقل كانت منطقية .
صرخت ويجا وقالت "أنا مقصدش كده أنا بفكره بالأيام السوده والكذب والتزوير ... بتحرفى الكلام ليه ياست"!
وممكن هنا تنزل موسيقى الناى الحزين على سبيل المؤثرات الصوتية لأن ويجا بتتحرك دلوقت بكل دلع، أيوه أهى بتتحرك أهه ، أيوه ج م ا ل .. بالضبط جمال نطق زكريا عزمى وقال " شوفت ياريس ويجا بتساند رأيك الصواب بتسليم أمور البلاد للمحروس جمال رؤية ثاقبة ياباشا إنت ماشى صح ... صرخت ويجا كمان مرة وقالت مفيش فايدة أنا أأقصد إنه هيخربها ... الناس دى بتفكر ازاى !!
بابا .. بابا لو سمحت ممكن نسألها إذا كان فى حد تانى نفسه فى السلطة ولا لأ علشان ناخد الإحتياط اللازم
اتحركت ويجا والعيون كلها حواليها وراحت ناحية "yes" يعنى نعم اتنفض الرئيس ودمعت عين ابنه .. الصغير طبعا وانطلق لسان زكريا عزمى قائلا " هدى نفسك ياريس وحياتك ماهيروح الكرسى إلا للى إنت عاوزه .. الكرسى كرسيك ياباشا" . طيب ممكن تقولى لنا ياويجا الناس بتحب الرئيس قد إيه ؟
فجاوبت ويجا من خلال حروفها وقالت " حب ايه .. اللى انت جاى... تقول عليها " فصرخ زكريا عزمى قائلا شوفت ياريس بتقول إنه حاجة فوق الحب بمراحل " اتنهدت ويجا وقالت" الله يخرب بيوتكم والله ما أنا لاعبة ده إنتوا بتنصبوا حتى فى اللعب ، حب ايه ياحرامية يانور هى الناس لاقية تاكل علشان تحب ، ده مستقبل أسود ومطين وعاوز الناس تحبه بأمارة ايه ياجدعان وشدت ويجا فى شعرها وحلفت إنها هتبطل تلعب اللعبة دى وهتروح تلعب "بلى مسافات طويلة" فى مركز شباب الحبانية .
راحت ويجا وفضل الرئيس والمدام وزكريا والأولاد حطين إيدهم على القشاط وبيصرخوا والنبى قوليلنا الرئيس هيقبى مبسوط فى فترة حكمه التاسعة ولا هتبقى فى حاجة تضايقه؟ والنبى ياويجا قولى الرئيس قلقان على مستقبله!